Ólafsdalsfélaginu þykir leitt að tilkynna að vegna mikilla framkvæmda Minjaverndar hf. við skólahúsið í Ólafsdal í Gilsfirði verður ekki af sumaropnun félagsins 2023.
Vegna framkvæmdanna og ófullnægjandi aðstöðu fyrir undirbúningshóp og gesti hátíðarinnar verður Ólafsdalshátíð 2023 felld niður. Ólafsdalsfélagið stefnir á að halda veglega Ólafsdalshátíð árið 2024.

Starfsemi Ólafsdalsfélagsins og menningarhlutverk verður óskert að öðru leyti og er mikill hugur í félaginu að tryggja farsæla endurreisn Ólafsdals, samfara því að standa vörð um verndun og viðhald þeirra einstöku menningarminja sem þar eru og stuðla að kynningu á þeim. Ennfremur að standa vörð um einkennandi útlit skólahússins í Ólafsdal. Ólafsdalur er órofa minjaheild og einstakur sem slíkur á landsvísu eins og fjölmargir sérfræðingar hafa staðfest. Í þessu samhengi er má vitna í orð Bjarna Guðmundssonar prófessor á Hvanneyri: „Í búnaðarsögulegu tilliti þarf að ganga um Ólafsdal eins og gengið er um Skálholt og Hóla í ljósi kirkjusögunnar.“

Þá minnir félagið á að fornleifauppgröftur á vegum Fornleifastofnunar Íslands mun halda áfram í dalnum sjötta sumarið í röð og fara rannsóknirnar að þessu sinni fram í fyrri hluta ágústmánaðar. Þar eru sífellt að koma í ljós nýjar byggingar frá landnámstíð aðeins um 1 km sunnan við skólahúsið. Góður styrkur fékkst úr Fornminjasjóði til verksins.

Með góðfúslegu leyfi Minjaverndar mun verða hægt að hafa sumaropnun á íbúðar- og skólahúsið í Ólafsdal.

Dyrnar verða opnaðar almenningi frá 10. júlí til 1. ágúst 2022.

Opið verður alla dagana milli 12 og 17.

Allan opnunartímann verða listaverk bræðranna Halldórs og Snorra Ásgeirssona til sýnis. Faðir þeirra var Ásgeir Hjartarson sagnfræðingur (1910-1974) en hann var sonur Ragnheiðar Torfadóttur frá Ólafsdal og Hjartar Snorrasonar frá Magnússkógum (sem var einn af skólapiltum í Ólafsdalsskólanum). Bræður Ásgeirs voru Torfi tollstjóri og Snorri skáld.
Halldór er með útiverk sem ber heitið „Orrustan um vindinn„ þar sem m.a. má sjá atgeirsodd sem snýst í takt við vindáttina, knúinn af þremur stálskálum er tengjast þriggja metra hárri járnstöng er rís úr jörðinni. Þar í kring er fuglsfjöðrum stungið niður ásamt nokkrum myndfánum af fuglum. Nútíð og fortíð mætast í átökum um vindorkugarða og blóðugt minni Sturlungualdar.

Snorri sýnir nýlegar litblýantsteikningar gerðar á pappír sem settar verða upp í suðurstofu skólahússins á fyrstu hæð. Þau verk eru liður í myndlistarverkefninu, „Nr. 4 Umhverfing“, sem fjöldi listamanna taka þátt í með sýningum í Dölum, á Ströndum og Vestfjörðum í sumar.

Staðarhaldarar í Ólafsdal í sumar verða m.a. Rögnvaldur Guðmundsson formaður Ólafsadalsfélagsins og kona hans Helga Björg Stefánsdóttir. Einnig Torfi Ólafur Sverrisson og fjölskylda.

Aðgangur að húsinu 900 kr., kaffi/te 400 kr., vaffla 700 kr. ,,Pakki“ aðgangur að húsinu með kaffi/te, og vöfflu (djús fyrir börn) á 1.600 kr. á mann.

Aðgangur ókeypis fyrir Ólafsdalsfélaga og börn 0-16 ára.

Nú eru galvaskir smiðir og aðrir iðnaðarmenn á vegum Minjaverndar mættir aftur eftir sumarfrí og halda áfram uppbyggingu húsanna í haust og vetur.

Veðrið var ljómandi gott allan tímann á meðan sumaropnuninni stóð og sól í allra sinni. Vinsælt var að ganga að víkingaaldarminjunum þar sem forleifafræðingar Forleifastofnunar Íslands voru að störfum. Þeir hafa nú lokið staðbundnum rannsóknum þetta árið. Endurreistar byggingar í Ólafsdal vöktu mikinn áhuga og eftir því tekið hversu vinnubrögð eru vönduð. Margir spurðu hvenær mætti fara að bóka gistingu á staðnum sem áformað er að opna fyrir sumarið 2024. Augljóst að mikill áhugi er fyrir því að gista og dvelja lengur í Ólafsdal þegar slíkt verður í boði, við sem höfum reynslu af því getum alveg skilið það.

Ólafsdalsfélagið þakkar Minjavernd fyrir að veita okkur enn eitt tækifærið til að hafa íbúðar- og skólahúsið opið fyrir gesti sem notið hafa sýningar og leiðsagnar í því góða andrúmslofti sem ríkir í þessu einstaka húsi.

Við þökkum öllum þeim yndislegu gestum sem lögðu leið sína til okkar í Ólafsdal hjartanlega fyrir komuna.

Sjáumst hress og kát á næsta ári!

Frá opnun hafa margir komið í Ólafsdal á degi hverjum. Eins og við bjuggumst við þá heimsóttu okkur fjöldi fólks um verslunarmannahelgina. Aðallega hafa þetta verið íslendingar en inn á milli erlendir ferðamenn. Sumir gesta greina frá tengslum sínum við Ólafsdal, eru afkomendur nemenda eða Torfa og Guðlaugar, hafa tengsl í gegnum Menntaskólann við Sund, eru nágrannar úr Saurbæ eða Reykhólahreppi. Alltaf gaman að heyra frásagnir fólks af sínum tengslum við staðinn, þær auðga og bæta við þekkinguna um líf og starf í Ólafsdal. Þann 3. ágúst fengum við einstaka heimsókn, þegar Bjarni Guðmundsson frá Hvanneyri kom færandi hendi. Hann færði, eins og hann orðaði það ,,Ólafsdalsskóla“, bækurnar ,,Íslenskir sláttuhættir“ og ,,Yrkja vil ég jörð“ að gjöf, en hann er höfundur beggja ritanna. Þessar bækur innihalda mikinn fróðleik um landbúnað fyrri tíma og þar með fróðleik um Torfa Bjarnason og Ólafsdalsskólann, þar sem bæði Torfi sem einstaklingur og starf það sem unnið var í Ólafsdal markaði straumhvörf í landbúnaðarsögu Íslands.

Líkt og áður taka heimamenn þátt í verkinu. Minjavernd leggur áherslu á að eiga gott samstarfi við nærsamfélagið og er það vel.  Síðan er von á fornleifafræðingum síðsumars og verður spennandi að sjá hvaða viðbótarvitneskja kemur fram í rannsóknum þeirra. Finna þau kannski Ólaf belg? 

Það mun verða um 3ja vikna hlé á vinnu Minjaverndar í lok júlí og fram í miðjan ágúst. Á þessum tíma mun Ólafsdalsfélagið vera með sumaropnun í gamla skóla- og íbúðarhúsinu, veita leiðsögn og bjóða upp á léttar veitingar. Um að gera að nýta það tækifæri til að heimsækja Ólafsdal, skoða skóla- og íbúðarhúsið og allt það sem verið er að byggja upp að ógleymdum víkingaskálanum.  Nú sér fyrir endann á vandræðum með atburðahald vegna Covid og því er stefnt að mikilli og skemmtilegri Ólafsdalshátíð laugardaginn 14. ágúst. Sumaropnun og Ólafsdalshátíð munum við kynna betur á næstunni þegar skipulagning og dagskrá liggur fyrir. 

Hér á síðu Minjaverndar má finna umfjöllun um framkvæmdina.