Fjölsótt Ólafsdalshátíð – Ósóttir vinningar

Ólafsdalshátíðin 2017 var sú fjölsóttasta frá upphafi enda dagskráin vegleg og veðrið lék við hátíðargesti.

Stjórn Ólafsdalsfélagsins færir öllum gestum og þeim sem lögðu sitt af mörkum í þágu hátíðarinnar, bestu þakkir.

Enn eru nokkrir vinningar ósóttir.

Þeir komu á miða nr. 86, 333, 381, 422, 458, 499 og 567 eins og sjá má á meðfylgjandi mynd.

Vinninganna má vitja hjá Rögnvaldi Guðmundssyni, formanni Ólafsdalsfélagsins; rognvaldur@rrf.is, farsími 6932915.

Víkingaaldarminjar í Ólafsdal?

Ólafsdalshátíðin hófst á sögugöngu undir leiðsögn Birnu Lárusdóttur fornleifafræðings. Efni þeirrar sögugöngu hefur vakið nokkra athygli enda mögulega fundnar minjar frá víkingaöld í dalnum. Hér má sjá frétt Skessuhorns um gönguna.

Ólafsdalshátíð 2017 – Fjölbreytt dagskrá

Ferðamálaráðherra, Laddi, Valdimar, Leikhópurinn Lotta, erindi um fornleifar í Ólafsdal, Harmonikkuleikarar úr Dalabyggð, gönguferð með leiðsögn, sýningar, handverks- og matarmarkaður, hestar teymdir undir börnum. Allir finna eitthvað við sitt hæfi á Ólafsdalshátíð 2017 sem fram fer laugardaginn 12. ágúst.

Dagskrá Ólafsdalshátíðar 2017

12.00-13.15 Gönguferð um minjastaði í Ólafsdal.
Hafa fundist víkingaaldarminjar í dalnum? Leiðsögumaður: Birna Lárusdóttir fornleifafræðingur hjá Fornleifastofnun Íslands. Mæting kl. 11.45.

13.00 Sala á miðum í Ólafsdalshappdrættinu hefst.
Veglegir vinningar: Miðaverð 500 kr.

13.00-17.00 Ólafsdalsmarkaður, grænmeti og sýningar í skólahúsinu

  • Lífrænt vottað Ólafsdalsgrænmeti, Erpsstaðaís, kræklingur frá Nesskel. Fjölbreyttur matar- og handverksmarkaður.
  • Ólafsdalsskólinn 1880-1907: fastasýning á 1. hæð.
  • Konurnar í Ólafsdal: sýning á 2. hæð.
  • Fræðslumyndband um Ólafsdal á 2. hæð.

14.00 HÁTÍÐARDAGSKRÁ

Erindi: Þórdís Kolbrún Reykfjörð Gylfadóttir, ferðamálaráðherra.

Gamanmál: Snillingurinn síungi Laddi (Þórhallur Sigurðsson) með 30 mínútna skemmtidagskrá. Afbragð fyrir tárakirtlana og hláturtaugarnar.

Tónlist: Félagar í Harmonikkufélaginu Nikkólínu í Dalabyggð taka á sprett.

Erindi: Fornleifar og menningarlandslag í Ólafsdal. Birna Lárusdóttir, forleifafræðingur.

Tónlist: Söngvarinn góðkunni Valdimar Guðmundsson syngur fyrir gesti. Undirleikari Örn Eldjárn.

Leiklist: Félagar í Leikhópnum Lottu skemmta börnum á öllum aldri.

Kynnir: Halla S. Steinólfsdóttir, bóndi í Ytri-Fagradal.

17.00 Dregið í Ólafsdalshappdrættinu.

Hestar teymdir undir börnum.

Kaffi, djús, kleinur, flatkökur og pönnukökur á sanngjörnu verði.

ATH: netsamband er stopult í Ólafsdal og því er gestum ráðlagt að hafa með sér lausafé til að versla og taka þátt í happdrætti.

Gestkvæmt eftir sumaropnun

Sumaropnun Ólafsdals hófst 25. júní og verður opið alla daga milli 12 og 17 til 19. ágúst.  Staðarhaldarar eru Elfa Stefánsdóttir leiðsögumaður og Haraldur J. Bjarnason. Búið er að gefa út ritling og veggspjald á íslensku og ensku.

Gestkvæmt var fyrstu daga sumaropnunar og meðal annars kom þangað hópur sextíu ára stúdenta frá MR. Við það tilefni voru eftirfarandi myndir teknar.

60_ára_MR_stúdentar

MR_1

MR_2

Ólafsdalshátíð

Dagskrá Ólafsdalshátíðar 2016_2

Dalablóð – Sýning Guðrúnar Tryggvadóttur

dalablóð-guðrún_tryggvadóttir

Dalablóð er heiti málverkasýningar Guðrúnar Tryggvadóttur í Ólafsdal, sem opnar þann 23. júlí kl. 14:00.
Sýningin stendur til 14. ágúst 2016 og er opin daglega frá kl. 12:00 til 17:00. Sýningin er í sex herbergjum á 2. hæð skólahússins í Ólafsdal þar sem Guðrún stillir upp formæðrum sínum og sér og dóttur sinni, hverri á móti annarri og skapar þannig aðstæður fyrir fjölskyldufund.

Guðrún segir um þessa sýningu og tilurð hennar:

Á undanförnum mánuðum og árum hef ég unnið að verkum sem fjalla um fjórðu víddina, tímann, birtingarmynd hans, tölfræðilegar staðreyndir í endurnýjun kynslóðanna og þau mynstur sem þær framkalla.

Ég þurfti að leita leiða til að sjá tímann á nýjan hátt, tengja hann sjálfri mér og þar með öllu mannkyni. Um leið er ég að rannsaka innbyrðis tengsl kynslóðanna, þynningu erfðamengisins og minningar sem við berum í okkur frá einni kynslóð til annarrar og hugsanleg áhrif þeirra á okkar líf.

Þessi vinna hefur leitt mig inn á braut sem virðist nær óendanleg því þær stærðir og sá massi sem við blasir er mannskepnunni í raun óskiljanlegur í óendanleika sínum.

Um leið hef ég verið að vinna úr minningum sem ég hef um formæður mínar og skoða hlutverkið sem þær hafa leikið í lífinu sem er í raun sama hlutverkið og hver manneskja leikur í dag og mun leika í framtíðinni.
Þetta stefnumót við formæður mínar varpar sífellt upp nýjum myndum og mynstrum sem mér finnast bæði upplýsandi og gefandi að skoða og vinna með innan ramma myndlistarinnar.

Sýningin „Dalablóð“ fjallar um formæður mínar í beinan kvenlegg, þær sem fæddust og bjuggu í Dalasýslu og okkur hinar sem fluttust suður. En þar sem ég hef enga persónulega minningu sem tengist Dalasýslu beint hefur það verið ævintýri að fara á heimaslóðir formæðra minna og setja mig í þeirra spor, vinna úr reynslunni og mála þær síðan á staðnum, í Dölunum.

Markmiðið var að tengjast formæðrum mínum í anda og efni og reyna að bera okkur saman eða sameina okkur. Finna einhvern þráð sem mig vantar og mér finnst áhugaverður í leit minni að sjálfri mér og eðli mannlegs lífs.

Niðurstaða mín er sú að í raun upplifum við allar það sama. Forvitni og gleði, ástir og sorgir og sífellda glímu við að fæða börnin okkar, hlúa að fjölskyldunni, finna lífinu tilgang og reyna að lifa af í harðbýlu landi. Líkami okkar er tímabundið ástand sem kemur og fer, umbreytist í nýja kynslóð sem aftur upplifir það sama. Er það sama.

Lífið er gjöf sem við verðum að segja skilið við og afhenda nýjum kynslóðum og í því felst í raun mikil hamingja. Dauðinn er ekki sorglegur heldur hluti af nauðsynlegri verkan tilverunnar.

Afrakstur þessa ferðalags um tímann má sjá í sex herbergjum á 2. hæð skólahússins í Ólafsdal þar sem ég stilli upp formæðrum mínum og mér og dóttur minni, hverri á móti annarri og skapa okkur þannig aðstæður fyrir fjölskyldufund, hljóðlátt samtal um lífið sjálft, tilgang þess, andann og efnisheiminn og gleðina yfir því að fá að vera þátttakendur í því að halda lífinu áfram með sífelldri endurnýjun.

Teikningar af byggingum í Ólafsdal

Hér eru teikningar af byggingunum í Ólafsdal, gerðar af Hjörleifi Stefánssyni hjá arkítektastofunni Gullinsniði.

Teikningar:

Samningur við Minjavernd undirritaður

Stjórn Ólafsdalsfélagsins fagnar samningi félagsins, fjármálaráðuneytisins og Minjaverndar um stórhuga uppbyggingu staðarins til þess horfs sem hann var í á tíma Torfa Bjarnasonar í Ólafsdal. Starf Ólafsdalsfélagsins, sjálfboðavinna og stuðningur ýmissa aðila frá árinu 2007 hefur gert þennan áfanga mögulegan. Ánægjulegt er að þessi tímamót verða á 100 ára ártíð Torfa Bjarnasonar.

Samhliða metnaðarfullri uppbyggingu Minjaverndar er tryggt að sögu Ólafsdals verður haldið á lofti og menningar- og jarðræktarminjar varðveittar og gerðar aðgengilegar til framtíðar. Ólafsdalsfélagið hefur í dag fallið frá langtímaleigu sinni á Ólafsdal og afhent Minjavernd keflið varðandi uppbyggingu staðarins. Um leið fær félag formlegt hlutverk varðandi miðlun sögunnar, rannsóknir og ráðgjöf um uppsetningu sýninga í Ólafsdal.

Ólafsdalur er einn merkasti menningarminjastaður á Vesturlandi og við Breiðafjörð og einstakur í landbúnaðarsögu Íslands. Því eru það hagsmunir allra samningsaðilar að merki staðarins sé haldið hátt á lofti. Ólafsdalsfélagið heldur því áfram starfi sínu við rannsóknir, fræðslu, skráningu örnefna og sagna, merkingu gönguleiða, lífræna ræktun grænmetis og árlega Ólafsdalshátíð. Ólafsdalsfélagið lítur með björtum augum til samvinnu við Minjavernd og stjórnvöld á komandi árum og hlakkar til áframhaldandi samstarfs við alla velunnara Ólafsdals, sumargesti í dalnum og gesti og þátttakendur í árlegri Ólafsdalshátíð.

Fyrirhuguð uppbygging í Ólafsdal er ein stærsta fjárfesting í atvinnulífi áratugum saman í Dalabyggð og Ólafsdalsfélagið væntir þess að hún verði byggðalaginu og nágrannasveitarfélögum lyftistöng.

„Ólafsdalsfélagið var stofnað til að endurbyggja Ólafsdal og breiða út vitund um staðinn og sögu hans. Við fögnum því að fá Minjavernd til að sjá um endurbyggingu af þessum metnaði og virðingu fyrir sögunni. Ólafsdalsfélagið mun þá einbeita sér að þeim þætti sem snýr að mannlífi, menningu og miðlun sögunnar,“ segir Rögnvaldur Guðmundsson, formaður Ólafsdalsfélagsins.

Bjarni Guðmunds flytur Sláttuvísu

Bjarni Guðmundsson, Hvanneyri, flytur Sláttuvísu Jónasar Hallgrímssonar við eigið lag eftir undirritun samninga um endurreisn Ólafsdals. Bæði lögin sem Bjarni flutti við góðar undirtektir gesta í Ólafsdal tengdi hann starfi Ólafsdalsskólans.

Ólafsdalur, perla sem allir þurfa að heimsækja

Ólafsdalur er merkur sögu – og minjastaður við sunnanverðan Gilsfjörð, um 6 km frá veginum yfir Gilsfjarðarbrúna. Þar var fyrsti búnaðarskóli Íslands stofnaður af frumkvöðlinum Torfa Bjarnasyni árið 1880, fyrir 135 árum. Auk þess er nú 100 ártíð Torfa (d. 1915).

Í Ólafsdal verður opið alla daga í sumar kl. 12:00-17:00 fram til 16. ágúst. Umsjónarmenn verða hjónin Elfa Stefánsdóttir tómstundafræðingur og Haraldur Baldursson tæknifræðingur. Sýningar eru þar um sögu Ólafsdalsskólans, konurnar í Ólafsdal o.fl., en auk þess er skólahúsið sjálft frá 1896 fallegt og skoðunarvert. Í sumar verður þar boðið upp á kaffi, rjómavöfflur og ís frá rjómabúinu á Erpsstöðum. Einnig geta gestir fræðst um lífræna rækun grænmetis í Ólafsdal og keypt það á staðnum. Fræðslustígur er í Ólafsdal og góðar gönguleiðir í fallegum umhverfi. Staðurinn er því ein af þessum perlum á Íslandi sem allir þurfa að heimsækja.

Ólafsdalshátíð verður að þessu sinni haldin laugardaginn 8. ágúst. Verður dagskráin fjölbreytt og fjölskylduvæn að vanda; tónlistaratriði, skemmtun fyrir börnin, áhugaverð erindi, vandaður handverksmarkaður og veitingar. Þá verður lífrænt vottað Ólafsdalsgrænmeti til sölu og glæsilegt Ólafsdalshappdrætti.